OS SEXTOS toman os micrófonos na biblioteca! SEMANA MUNDIAL DO ESPAZO 2026.Actividade do PDI-POLOS CREATIVOS e RADIO NA ESCOLA.
O alumnado de sexto crea os seus propios podcasts na clase de Lingua
A biblioteca escolar énchese de voces, ideas e creatividade! O alumnado de 6º converteuse en protagonista dunha experiencia radiofónica na que aprendeu a comunicar, investigar, escribir, gravar e editar os seus propios podcasts.
Dentro da clase de Lingua Galega, os nenos e nenas deseñaron e elaboraron os seus programas de radio utilizando o programa Audacity. Ademais, incorporaron música libre de dereitos, seleccionada e descargada de fontes axeitadas, para darlles ritmo e personalidade ás súas creacións.
Durante este proceso, o alumnado participou activamente en todas as fases de elaboración:
- Escolma dos temas e organización das ideas.
- Investigación e preparación dos contidos.
- Redacción dos guións.
- Ensaios e expresión oral.
- Gravación das voces.
- Edición dos audios con Audacity.
- Selección de música libre de dereitos.
- Escoita, revisión e mellora dos podcasts.
Esta actividade permitiulles desenvolver importantes competencias clave, entre elas a competencia en comunicación lingüística, a competencia dixital, a competencia persoal e social, a competencia emprendedora e a competencia en conciencia e expresión culturais. Tamén fomentou a creatividade, a autonomía, a responsabilidade e o traballo cooperativo.
A proposta enmárcase no noso PDI “Couceiro Star: unha escola entre estelas” e está relacionada coas actividades de STEM de Polos Creativos e co programa Radio na Biblio, facendo da biblioteca un espazo para aprender, experimentar, crear e compartir.
Desde a biblioteca escolar queremos felicitar o alumnado de 6º polo seu entusiasmo, pola súa imaxinación e polo excelente traballo realizado. Cada podcast é unha mostra do seu esforzo e da súa capacidade para transformar as aprendizaxes nun produto comunicativo propio.
Animádevos a escoitar os podcasts de 6º A-B!
No hay comentarios:
Publicar un comentario